Es ist gewesen vor vilen und langen jaren jaren in dem kunigreich Portugal ein armer man mit nammen Erich, welchen got in seiner armut mit vil kinden, soen und toechtern, begabet. Dieselbigen kinder aber got mit wunderbarer schoene an die welt kommen liess, so das gemelten Erichen aller arbeit, angst und armut gar nit beschweret. Dann sobald er von seiner arbeit des nachtes heym zu hauss kam, legt er von im sein bickel und hawen, nam zu im seine jungen und schoenen kinder, schimpffet und schertzet mit freuden mit in, als wann er den gantzen tag keiner arbeit nie gepflegen. Sobald auch seine kinder etwas erwuchsen, begerten sie von im die reichen kauffleut. Die wurden dann gar fleissig und wol bei ihn aufferzogen, und so sie dann zu mannbaren tagen erwachsen, wurden sie gar ehrlich von denselbigen versorgt und aussgesteurt; niemant aber wolt dem guten Erich zu hilff und statten kommen. Das weret so lang, biss sein haussfraw Felicitas (also was ir nam) ires letsten sons genesen thet; dann mit demselben kind kam ir und irem hausswirt gross gluck und heyl auff erdtrich...